Browsing category: Sjrief mer plat

  • 25-06-2019

    Wie sjoan ós Limburg is

     

     

    Wie sjoan ós Limburg is!

    [dropcap]S[/dropcap]juus zoa wie ekerein, höb se gein invlood op de plaats wao se gebaore wurs. Zoa väöl leng, plaatse en luuj op de welt, en precies dao, in die plaats en dat hoes sjteit diene weeg. Veur mich is dat Hölsberg gewaes en gebleve; ’n sjoan sjtökske Limburg wo se berg aaf weggeis en berg op truukkumps of angesjum.

    ... dan sjrief mer plat!
    Laes hiej ’t artikel in de Hulsberger

    Wie ich miene ièsjte fiets kreeg kaom ich dao pas ech achter. Ummer mer die berg op en aaf fietse um örges te kómme. Wat heij ich dao ‘ne hekel aan. Ich zoog veural nieks van de umgaeving, ich dach allein mer aan dae volgende berg dae ich weer op moos fietse en ich höb vreuger get kilomaeters in Limburg gefietst. Geweun fietse um te fietse zoot d’r dan ouch neet biej.

    Later wie ich ‘ne auto heij, zoog ich eigelik pas wie sjoan ós Limburg is, al die berg, die krónkelwaeg tösje de boesj, die weie mèt hiej en dao ‘ne meule en Hollendesj die mich nao de sjoanste plekskes van Limburg sjtuurde. Meh toch, genete van ós Limburgs land deise neet in ‘ne auto en met de fiets de Limbugse berg euverwinne zoot d’r nog ummer neet in. Dus höbbe veer ós ‘ne scooter aangesjaf womèt veer al (of pas) 8 jaor alle waeg, paedjes, hollewaeg insjlaon die veer taegekómme en aafwachte in welk plaetske veer dan weer oetkómme. En ’t allerleefste gónt veer al die berg op en aaf um zoaväöl meugelik te genete en te zeen van ’t sjoanste sjtökske Nederland.

    Wie sjoan ós Limburg is …

      

    De Hulsberger – jaargang 3 – editie 29 – juli 2018

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 24-06-2019

    Nostalgie

     

     

    Nostalgisch Hölsberg.

    [dropcap]W[/dropcap]aor ’t vreuger baeter es noe? Ich dink ’t neet meh ’t waor toen gans angesj. Es kind zeende verzónne veer van’al um ós te ammezere en dat moch veural neet väöl koste.

    De Kèrksjtraot, wo ich gebaore bèn, waor ’n kingerrieke sjtraot. Biej Curfs heije ze 5 kinger, biej Vrolings 3, Limpens 2, Bosch 3, Bemelmans (Electro) 2, Satijn 2, Hambeukers 3, Habets 6, Koolen 2, Houben (Sjmid) 3, Keulen (Sjlechter) 5 en biej Moonen (Mèlkboer) 4 kinger: Opgetèld 40 kinger! Mèt good waer dan woort ekerein biejein gerope en dan sjpeelde veer “biej ós” op sjtraot.

    ... dan sjrief mer plat!
    Laes hiej ’t artikel in de Hulsberger

    Soms mochte “die van de” St. Clemenssjtraot ouch mètdoon. Versjtöpperke waor waal populair, zjuus wie zoa trefbal. ’t Ziejtuintje van Houben (in de Dr. Poelssjtraot) woort gebroek um mètske te werpe. Oet de keukela woort dan sjtiekem ’n sjèlmetske gepak en dan gings se land verovere door ’t mètske op ’n spesjale meneer op de grónd te sjmiete. Dat dit af en toe ouch waal ins foutging is vanzelfsjpraekend. In de winter mèt sjniè, woort biej ós veur op de sjtoep kejbane gemaak. D’r moch allein mer mètgekejd waere esse de goow sjeun aan heis (de zaol moch neet bot zin). Umtot de meiste wintersjeun waal “bot” waore, woorte dèks de zomersjeun oetgehaold, umtot die waal good euver de gemakde iesbaan haer gliedsjde.

    In de St. Clemenssjtraot dege veer sjtoeprande. Dat kós dao gans good umtot d’r toen amper ‘ne auto sjtóng, de sjtoeprande precies hoag genóg waore en de aafsjtand van de waeg good waor um raak te goesje. Meh door de jaore haer is dit sjtraotbeeld verangerd. Ze sjtónd noe vol mèt auto’s en de ouwerwètse sjtoepe waere gaondewaeg vervange zónger sjtoeprand.

    Neet gek dus dat de kinger van noe ’t vertaer binneshoes zeuke.

      

    De Hulsberger – jaargang 3 – editie 30 – augustus 2018

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 23-06-2019

    Beekdaelen

     

     

    Baekdale – Nederlands: Beekdaelen

    [dropcap]D[/dropcap]e zomer is um en ’t naojaor lièt zich al van alle kante zeen en veural veule. Dit hilt dan ouch in dat veer bienao aafsjied mótte numme van Groat Nuth. Nao 37 jaor wurd Hölsberg wir get kleiner in ’n nog groater gebeed.

    In november gónt veer sjtumme veur ’n nuuje gemeinteraod, meh noe geit ’t waal euver 15 kèrkdörpe, wat veur de kandidate ‘ne helle rees wurd um ‘ne sjtool te bemachtige. En in 2019 is ’t dan zoa wiet, Hölsberg geit nao Baekdale (in ’t Nederlands wurd dit gesjreve wie: Beekdaelen), zjuus zoa wie die angere 14 dörpe: Austroa, Bèngelder, Doonder, Joabik, Merkelbek, Nut, Oësjbik, Pöt, Sjömmert, Sjènne, Sjilvend, Zjweikese, Vaosje en Wienesrao. En dan höb ich ’t nog neet euver de gehuchte / buurtsjappe.

    ... dan sjrief mer plat!
    Laes hiej ’t artikel in de Hulsberger

    Van de Ravensbosch tot Heringsbosch (Sjilvend) in ’n bienao rechte waeg door Baekdale is óngevaer 21 km. Dat vilt mèt, toch? Meh wil se dizze waeg mèt de auto aaflègke, maog se raekene op 45 minute riejtied. Dus esse get vergaete höbs en mós truukrieje, bèsse diek twiè oer óngerwaeg en dan mósse ouch nog ins truuk heivesj 😉 . En wat mich dan ummer opvilt es ich door de dörpe van ONS (Óngerbanke, Nut en Sjènne) riej, meh dat geld eigelik veur bienao alle Limburgse dörpe, is dat de plaatsname ouch in ’t Limburgs op de plaatnaamborde zint gesjreve. Behalve in Groat Nut! Wat ving ich dat ummer jaomer.

    Meh vanaaf 1 jannewari kómme d’r nuje Kanse zoatot ouch o.a. Hölsberg zien eige Limburgs plaatsnaambord kriet. Want Kanse kriege veer, sjuus zoa wie Kwaliteit, Kwetsbaarheid en Koste (de 4 K’s van de herindeiling van Baekdale), wat dit ouch mer maog inhoute.

    Welkóm in Baekdale. De gemeinte van uch, van mich, van ós (oeps: van ONS).

      

    De Hulsberger – jaargang 3 – editie 32 – oktober 2018

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 22-06-2019

    Kerkhof Allerheiligen

     

     

    Kèrkef veur Allereheilige.

    [dropcap]G[/dropcap]epak en gezak mèt ’n naat deukske, ’n klein blumke en ’n noveenkaers ginge v’r nao ’t kèrkef um de urnmoer te fatsoenere. Kwa tied zou ’t neet miè es vief menute in besjlaag numme, waor ’t neet dat miè luuj richting de graafplaats ginge. Want veur Allerheilige wilt me toch dat ’t d’r wir good oetzuut.

    ... dan sjrief mer plat!
    Laes hiej ’t artikel in de Hulsberger

    Sjoepkarre, ummers, sjöppe en anger gereidsjap, waere ’t kèrkhof opgeduujd, danwaal gedrage. En gebuukt waere de grave wir sjoan gemak. En toch is ’t dat neet allein. Euveral zuuste luuj mèt ein kalle, lache en wieze um dan wir wier te gaon mèt die taak wao ’t euver ging. Veur mich waor ’t neet angesj, effe kalle mèt d’n eine, ’n grepke make mèt d’n angere en kieke wae nog alleneij dao is en opins zint v’r ’n oer wiër.

    Normaal loup ich ouch nog ummer ’n rundje op de graafplaats en sjtaon soms sjtil biej ’n bepaald graaf wao herinneringe wir nao baove kómme. Wat ’n versjil van wie ich dat vreuger ervoor. Mèt ’n groate baog leep ich um ’t kèrkef haer want wae wèt wat d’r kós gebeure zoa kort biej de hei. Doaje die missjien opsjtónge en mich get aan zouwe doon? Meh noe kèn ich genete van de ligking en de rös die dao is. En es ich daovan höb genaote loup ich nog effe langs pap en mam veurtot ich door die sjoan paort heivesj gaon. Dan driè ich mich nog ins um en weit dat die nog hauf aope sjeit.

    Meh ’t saoves dan geit die toe, want de wèts mer noats …

      

    De Hulsberger – jaargang 3 – editie 33 – november 2018

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 21-06-2019

    Kerstverhaal

     

     

    ’n Kaesjverhaol.

    [dropcap]W[/dropcap]at is Kaesjmis eigelik? Is ’t allein ’n christelijk fiès of zit d’r ouch ’n boadsjap in veur ekerein, óngeach rang, sjtand of geluif? ’t Zou toch sjiek zin es ekerein hand in hand door ’t laeve geit. ’n Sjprookje? Of toch neet?

    Veer sjrieve de 14e dissember lang geleje. Op de Noordpool in Kaesjsjtad, wo de roaje elfkes woonde, makde ze zich vaerdig um te vechte taege de blauwe elfkes oet ’t oaste en de gaele elfkes oet ’t weste. Op 15 dissember ging ’t los en road, blauw en gael vóchte op kapot aaf.

    ... dan sjrief mer plat!
    Laes hiej ’t artikel in de Hulsberger

    De roaje elfkes wónne dae daag meh waore  bekaaf. ’t Sjnachs kóste alle troepe zich oetröste en veurbereide op ’t gevech daags d’rop. Noe wónne de gaele elfkes, mèt de tóng op hun puntsjeuntjes. Sjnachs woort wir oetgerös en zich vaerdig gemak veur ’t volgend gevech. Dis kièr wónne de blauwe, ram oetgetèld. En zoa ginge de daag veurbiej, tot 24 dissember.

    De blauwe en gaele elfkes wouwe neet miè vechte en de roaje elfkes wouwe vreej. En zoa gebeurde ’t ouch in Kaesjsjtad. ’t Oaste en ’t weste pakde zich same en pats! … de blauwe en gaele vermengde zich tot greune elfkes. Ouch de roaje elfkes hele zich good vas en kebeng! … de Kaesjman! En nog veur middernach heije alle elfkes hun waerdvolle bezittinge oet ’t oaste en ’t weste nao Kaesjsjtad gehaold, die door de Kaesjman ièrlik verdeild woorte. De leechskes woorte aangesjtaoke en same vierde ze fiès op de 25e en 26e dissember. Kaesjmis waor gebaore!

    En toen? Toen sjrók de Kaesjman wakker …

      

    De Hulsberger – jaargang 3 – editie 34 – december 2018

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 20-06-2019

    Uitroepen prinsenpaar 2019

     

     

    Oetrope Prinsepaar 2019.

    [dropcap]’t[/dropcap] Ièsjte wiekend van ’t nuje jaor is ummer wir sjpannend. Veur de eine get miè es veur de anger. Meh ein dink weit ich zeker en ich kèn ‘t weite, ’t nuuj prinsepaar van de Beumerwalders haet missjien waal de meiste nerve.

    Eker jaor begint ’t al op de 11e van de 11 te kriebele biej de carnavaliste ónger ós. De aaftrap is ummer op ’t Vriethof in mesjtreech en daonao is ’t effe sjtil mèt carnaval, behalve op de radio. En dan kómme de fièsdaag. Nieks carnavalistisch aan, meh aan mennige taofel wurt dan toch gesjpikkeleert wae ’t nuje prinsepaar van ’t kómmend carnavalssezoen geit waere.

    ... dan sjrief mer plat!
    Laes hiej ’t artikel in de Hulsberger

    Vreuger waor d’r ‘ne pot wo ingelag kós waere of wae d’r prins zou waere. Huuj huèr ich d’r nieks miè van. Meh dat wilt toch neet zègke dat ’t neet miè laeft. En wie gek ’t ouch is, pis tot de persoon in kwestie eindelijk prins is gewore, geit dae naam nog ummer de runde. En zoa waor ’t ouch dit jaor. Ummer truukkómmende name en bienao ekerein heij ’t dit jaor good. Mèt ein versjil, ze wiste ’t neet zeker. Eindelijk, eindelijk nao zoa väöl jaor sjpikkelere, waor ’t dan toch ech.

    In ’t jubileum jaor maog Roger Dormans zich de 66e prins van CV de Beumerwalders neume same mèt zien vrouw Ilona Vleugels es prinses. ’t Kómmende jaor gónt zie same door ’t laeve es Prins Roger 3e en Prinses Ilona. En nao ’t sjrieve van dizze column is ’t biej mich nog neet bekènd welk jeugdprinsepaar hun zal biejsjtaon. ’n Kreftig Driewerf ALAAF veur Prins Roger 3e en Prinses Ilona en Jeugdprins ??? en Jeugdprinses ???. Maak väöl sjpass en geneet d’r van! En ’t volgend jaor kènne veer eine naam wegsjtrepe.

      

    De Hulsberger – jaargang 4 – editie 35 – januari 2019

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 19-06-2019

    Maske Prinselaria

     

     

    Prinselaria in ’t Maske

    [dropcap]E[/dropcap]ker jaor wurt mèt carnaval ’t Maske oetgereik. Dit is van oudsher de carnavalseditie van “Het Land van Valkenburg”. Zoa wie bekènd hoort vreuger ’n groat deil van Valkeberg biej Hölsberg. Tot op de daag van vandaag maog Hölsberg nog ummer mètdoon aan dizze editie es vraemde aend binne ’t Valkebergse.

    ... dan sjrief mer plat!
    Laes hiej ’t artikel in de Hulsberger

    De opzat is dat ekere carnavalsvereiniging van Vallekeberg en umsjreke get euver ’t prinsepaar geit sjrieve, mèt es belangriekste punt de Prinselaria. Dit kènt vanal zin en meistal wurt ’t prinsepaar dan op de hak genómme. Dit geit gepaart mèt de èllef punte van de proklamatie. Zelde dat dit lètterlijk euvergnómme wurt. Meistal zit dao ‘ne drèj aan en wurt dat good aangediekt. En zint d’r nog get weitenswaardighede binne de vereiniging te melle, dan kènt ’t zin dat die ouch doorgegaeve waere.

    Zoa ouch dit jaor. Mèt ’n vereniging dat 6×11 jaor besjteit is waal get euver te vertèlle. En intressanter is nog de Prinselaria van ’t jubileumprinsepaar Prins Roger III en Prinses Ilona. Want zègk noe zellef, dao is genóg euver te sjrieve. Daobiej, ’t oetreike van ’t Maske is eker jaor wir ’n ganse heppening. Alle prinsepare waere oetgenuèdigd mèt hun Raod van èllef um ’t Maske offisjeel te óntvange in ’t biejzin van hun redakteure. Dit alles geit same met live meziek, ’n hepke en ’n drenkske. Ouch benuujd wat d’r dit jaor te melle is in ’t Maske? De waek veur carnaval zal dit blaedje biej ekerein in de brevebös valle. Veur de res wunsj ich ekerein ‘ne hièle sjoane carnaval en sjleet aaf mèt ’n Kreftig Driewerf Alaaf veur Prins Roger III & Prinses Ilona, Jeugprins Tijn I & Jeugprinses Noa en CV de Beumerwalders.

      

    De Hulsberger – jaargang 4 – editie 36 – februari 2019

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 18-06-2019

    Enne?

     

     

    Enne?

    [dropcap]”E[/dropcap]nne?” “Ouch enne!“ “Good doorgekómme?“ “Alles euverlaefd!“
    Ekere Limburger wèt wat hiej bedoeld wurt noe direk zoa nao de carnaval. Zouwe veer dit voloet sjrieve, dan sjteit d’r eigelijk: “Hoi, wie geit ’t mèt dich?” “’t Geit good mèt mich!” “Höbs te ‘ne sjoane carnaval gehad?” “Jao, ich höb mich good geammezeerd!”

    ... dan sjrief mer plat!
    Laes hiej ’t artikel in de Hulsberger

    Dit is noe ech tiepies Limburgs. Es veer ós taegekómme dan beginne v’r mèt ’t vraogwoord “Enne?”. Toch is d’r ’n groat versjil of se waal of gein interesse höbs in ’t antwoord van d’n anger. Wils te ech weite wie ’t mèt ‘m geit, dan gebroeke veer ózze “zangtoan” en beginne van lièg nao hoag en trèkke ’t ièsjte gedeilte langer: “E__nne?”. Dit wurt ouch entesjas oetgesjpraoke. Sjtèl dat ’t neet zoa good geit mèt d’n anger, dan geuf ‘r es antwoord: “Och”. Ouch hiej gult de toan van wie ’t gezag wurt. Wurt ’t lank getrokke en van hoag nao lièg en is de zin nog neet aaf, dan wilt hae d’r euver kalle en angesj hoof dat neet zoa nuèdig.

    Noe haet ’t Limburgs nog miè van die oetsjpraoke, waomèt miè wurt bedoeld es gezag. En soms waere die herhaald. Biej ónverwachs bezeuk aan de deur: “Kóm in, kóm in!”. Aan de taofel oetnuèdige: “Sjuuf aan, sjuuf aan!”. Biej ’n sjaol mèt belègkde bruèdsjes: “Pak aaf, pak aaf!” en es ‘t ’t lètse bruèdsje is: “Aet op, aet op!”. Boekpien van ’t lache door sjtómme kal: “Sjei oet, sjei oet!”. Wachte op de kloe van ‘n mop: “Laot gaon, laot gaon!”. En höb se doosj: “Sjöd in, sjöd in!”. En es ‘ne Hollesje Limburger wilt dat ich noe oetsjei: “Hoor op, hoor op!”.

      

    De Hulsberger – jaargang 4 – editie 37 – maart 2019

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 17-06-2019

    Limburgse uitdrukkingen

     

     

    Limburgse oetdrökkinge

    [dropcap]’t[/dropcap] Is alwir lang geleje dat ich hiej get Limburgse oetdrökkinge op neergesjreve. In middels bèn ich d’r wir gans get taegegekómme. ’t Sjoanste (teminste dat ving ich dan) is dat d’r door gans Limburg veur dezelfde beteikenis, get angesj wurt gezag. Soms hièl versjillend en soms waere d’r allein anger weurd gebroek.

    Es ’t vreuger gesjnièd heij dan makde veer veur op de sjtoep ’n glietsjbaan en ginge veer kèjje. En es ’t te glad woord gebeurde ’t waal ins das te waors oetgeroetsjd op de sjlidderbaan. Dit gebeurde toch meistal biej die, die zoa gezjwank waore wie ‘ne kleijerkas. Want zoa’ne sjtieve prengel is zoa flexibel wie ‘ne sjtoeptegel biej min-twintig.

    ... dan sjrief mer plat!
    Laes hiej ’t artikel in de Hulsberger

    Es ’n vrouw de vreugmès euver de hoagmès haet hange dan hóng de óngerrok ónger ’t kleid oet of dan heij ze de vlag oethange. En haet ze ’t deig euver de vlaplaat hange of ’t dook euver de karresel dan haet ze ’n dieke vot en dat haet geld gekos. ’t Taegeneuver gesjtèlde waor ‘ne sjmaalbètser of ‘ne sjmale remmel. Dae haet geine sjleutel nuèdig um binne te kómme, want ‘r pas door de brevebös of door ’t sjleutelgaat of kèns ‘m zelfs ónger de deur sjuve. Zoa ènne is zoa sjmaal das te ‘m door ’t lampeglaas kèns trèkke en ónger de douche mót ‘r van links nao rechs sjpringe um naat te waere. En zouwe anger luuj dit ech zeen gebeure dan zuus te ze kieke wie ‘ne boetsauto of wie e kumpke of ‘ne verkleide. Es d’r ’n knap maedje langskump dan is dat geine póngel, dao zous te nog ’t douchwater van opdrinke of zelfs ‘ne maeter sjtrónt vraete, me dan mót ze waal hièl erg knap zin.

    Umtot d’r nog genóg oetdrökkinge zin, wurt dit nog waal vervolgd, meh dat zit nog in wiej zek …

      

    De Hulsberger – jaargang 4 – editie 39 – mei 2019

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 16-06-2019

    Aan alles komt een einde

     

     

    Aan alles kump ’n ènd

    [dropcap]A[/dropcap]an alles kump ’n ènd. Eker eind haet ’n nuuj begin. Nao 40 edities van “de Hulsberger” is dit de lètste editie van dit maondblaad en dus ouch de lètste kièr dat ich ’n sjtökske Limburgs zal sjrieve in dizze column. Veur mich is dit de 30e kièr woh-in ich zin en ónzin höb maoge deile mèt uch, veural mèt de bedoeling um ’t Limburgs toegankeliker te make.

    ... dan sjrief mer plat!
    Laes hiej ’t artikel in de Hulsberger

    Wat begós mèt de oetgegaeve button “Ich bin unne echte Hulsberger” en mien reactie dao op euver drie foute in vief weurd, woort ich benaderd door “De Hulsberger” um ’ne column te sjrieve euver ’t Limburgs. Dit höb ich mèt twiè heng aangegrepe en höb zoa good es kós euver vanalle meugelike óngerwerpe get gesjreve. ’t Resultaat is nao mien meining, dat ich zeen dat ‘r miè plat gesjreve wurt es veurhaer, meh nog nog sjieker ving ich, dat ‘r ouch miè gesjreve wurt volges de reigels van de Limburgse Taal.

    Wo ich ièder reigelmaotig vraoge kreeg euver de sjriefwieze van Limburgse weurd, zoa wiènig waer ich noe benaderd um get in ’t Limburgs te vertale. En zeker, d’r ware nog get “foute” gemak, meh ’t is waal te zeen dat d’r wurt naogedach euver de sjriefwieze.

    En noe bèn ouch ich aan ‘t eind gekómme van de lètste column “Dan sjrief mer plat…” in de lètste editie van “de Hulsberger”. Ich höb hiej gaer in gesjreve, meh höb ’t ouch mèt väöl plezeer gelaeze en bèn miè te weite gekómme euver de luuj, vereiniginge en de gesjiedenis van Hölsberg. En wie al ièder gezag dat eker eind ’n nuuj begin haet, zoa houp ich dat door mien biejdrage aan ’t Limburgs ’n begin is gemak en uch haet gesjtimuleert um hiej mèt door te gaon.

    Redactie en laezers van “de Hulsberger”: BEDANK!!!

      

    De Hulsberger – jaargang 4 – editie 40 – juni 2019

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

    • Next