Kerstmis en Nieuwjaar - Helga Keulen

Zalig Kaesjmis en Gelökkig Nujaor.

De twiè meis gebroekde wuerd in december en jannewari, gesjreve of gekald en in welke taal dan ouch, zint Kaesjmis en Nujaor. Mèt de twiè Kaesjdaag wunsje veer ós alleneij ‘n Zalig Kaesjmis! En in jannewarie wunsje veer ós ‘n Zalig Nujaor! En dan neet allein op Nujaorsdaag, mer 6 daag lank tot aan Drie Keuninge.

Mer is ’t noe Zalig Kaesjmis, Gelökkig Kaesjmis of wunsje veer ós Sjoan Kaesjdaag? En ouch mèt Nujaor; is ’t Zalig of Gelökkig Nujaor? In eker geval ’t woord Zalig wurt hiej ummer minder gebroek en geit al langzaamaan richting vergaete weurd.

... dan sjrief mer plat! — Laes hiej ’t artikel in de Hulsberger

Wat nuuj is, is dat veer ós op 31 december ‘n Oudjaor toewunsje; ‘ne Sjoane jaorswisseling; ‘ne Goje roestj; ’n Good oeteind. Hiej oet bliek dat de wunsj van dizze daag get creatiever is.

Net wat mèt Nujaor al richting vergaethook geit, is ’t verrasje biej de femilie:
Gans sjtil en sjtiekem nao binne sjluipe en es ièsjte ekerein verrasje mèt ‘t versje: “Zalig Nujaor, de kop vol haor, de mónd vol teng, waffel in de heng” en dan houpe dasse verrasjgeld kreegs um mèt ’n dieke buèsj heivesj te gaon. ’t Nuje jaor waor dan pas ech begós.

En naeve ’t alum bekènde “Zalig Kaesjmis en ’n Gelökkig Nujaor”, wunsj ich uch ouch:

’t Inchecke van vluch 2017 is aangekóndigd.
De tösjelandinge zin: gelök, gezóndheid, leefde en vrundsjap.
De vluch doert 12 maond.
Nao de landing kèn se dich um 24 oer biej ‘gate’ 31 melle.
Goje reis en ’n Zalig Nujaor!

De Hulsberger – jaargang 1 – editie 10 – december 2016

Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

volgende >>