Maand: juli 2019

  • 05-07-2019

    Limburgse uitdrukkingen

     

     

    Limburgse oetdrökkinge.

    [dropcap]D[/dropcap]at ’t Limburgs aan ’t vernederlandse is, weite v’r inmiddels waal. Meh neet allein de weurd, ouch die tiepisch ouw Limburgse oetdrökkinge, die meistal get te make heije mèt ’t boerelaeve, gónt verlaore. Hiej wil ich waal ins op truuk kómme.

    De mós dich aanpasse! Vreuger zeije ze: Me mót zich rèkke nao de dèkke! Dit haet te make mèt de lengte van ’n daeke op ’t bèd wat neet ummer precies pasde, wodoor ze dichzelf zoa moos dreije um d’r waal ónger te kènne sjlaope. Dat sjprèk vanzelf, toch? Ofwaal: Driej batse is angerhauf vot! Es te kèns tèlle is dit waal logisch.

    ... dan sjrief mer plat!
    Laes hiej ’t artikel in de Hulsberger

    Stjèl dat ’n vrouw oet de huègte deit dan haet ze van baove bónt en van ónger sjtrónt! Geit die vrouw ouch nog vraem, dan zit d’r ‘ne vraeme haan op ’t toefes! Es häöre ouwere man dan nao ’n jónk bleumke kiek, gónt ouw sjure wir brenne! En geit ‘r ouch nog nao de vrouwe, dan haet hae gaer vraem sjpek. Zoa emes dae kiek neet zoa nauw, dem is ‘ne haan mèt ‘ne hood nog good!

    Ich kèn mich veursjtèlle dat ze oeteindelijk toch alles ièrlijk gónt opbeechte, dan sjoere ze zich de kaetel. Es hae ’t dan nog erger mak en op de koffie kump, haet ‘r zien vrouw van ’t bèd op ’t sjtruè gehólpe en haet ‘r zich de eier gesjtoekt.

    Ich zègk mer zoa: Ekerein ziene sjmaak zag ’t verke en vroot sjtrónt!

      

    De Hulsberger – jaargang 2 – editie 17 – juli 2017

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 04-07-2019

    Komkommertijd

     

     

    Kómkómmertied.

    [dropcap]V[/dropcap]eer zitte midde in de zomer en väöle ónger ós höbbe noe vakans (of al gehad). Zoa is ’t ouch op de tillevies. Alleneij herhalinge kómme truuk en d’r kump nuuts langs wo me ièder gein aandach aan goof; mèt anger weurd: ’t is kómkómmertied!

    Ich höb mer ins opgezóch wo dae kómkómmertied haer kump. ’t Geit de runde dat ’t van ’t Ingelsj aafkump: Cucumber time! Vreuger woort dit gebroek biej de sjnieders, umtot d’r in de zomertied nemes kleijer leet make. En umtot d’r daodoor gein opdrachte en dus ouch gein geld binnekaom en toevallig ouch in die periode de goodkoupe kómkómmers waste en riepte, ginge ze dizze vruch aete. ’n Anger verhaol deit de runde dat ’t oet ’t Duutsj kump: Sauregurkenzeit; mèt ‘n gelieke boadsjap. In eker geval is ’t biej ós euvergenómme vanoet ’n anger taal.

    ... dan sjrief mer plat!
    Laes hiej ’t artikel in de Hulsberger

    En sjoan gezag: Kómkómmertied is ‘n eker jaor  truuk kómmende tied wo d’r minder drökte of vertaer is es geweunlik binne de handel, bedrieve of vereiniginge.

    Noe vraog ich mich waal aaf weniè d’r in Hölsberg kómkómmertied is? ’t Klop dat väöl luuj op vakans gónt, meh d’r kómme ouch väöl vakantiegengers nao Hölsberg. En naeve de handel en bedrieve, zint d’r hendig väöl vereiniginge die in o.a. dit jaor vanaaf april tot september get te beje höbbe, zoa wie: Hoevefeest – Math Huijts Kèrmismaondig – Rochusjubileum – de Tent Sjteit – Rochus markt – Neet te Filme – en wat ich nog vergaete bèn (sorry).

    Wie ’t ouch zit mèt de kómkómmertied, ouch ich heij dizze kièr wiër nieks te melle!

      

    De Hulsberger – jaargang 2 – editie 18 – augustus 2017

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 03-07-2019

    Limburgse spellingchecker

     

     

    Limburgse sjpellingstsjekker door Microsoft

    [dropcap]’n[/dropcap] Paar waeke truuk sjtóng ’n sjoan sjtök in de gezèt mèt de titel: “Microsoft doet het op z’n Limburgs …”. Dubbelzinnige titel, dach ich nog, mer oeteindelik ging ’t d’r toch euver dat de Limburgse Academie ‘t Limburgs mèt moderne middele toegankelik wilt make veur ’n groat publiek.

    Ummer miè luuj zint (gelökkig) bezig um, veural in de social media, Limburgs te sjrieve. Mer umtot de sjpelling toch veur väöle hièl meujlik is, wurt d’r dèks op geveul get gesjrve. En zeker, ekerein sjnap toch waal wat d’r bedoelt wurt, meh wil se ech serieus aan de sjlaag mèt ’t Limburgs, dan zuus te soms door de buim de boesj neet miè. Dit kump umtot d’r väöl klinkers mèt accente gesjreve waere en tot d’r vraeme lèttercombinaties zint. Dit is dan ouch dèks de raej um aaf te haoke en dan toch mer alles in ’t Nederlands te sjrieve. Doanaeve, es te begins te type in bv. “Whatsapp”, dan versjient d’r ’n veurgesjtèld woord in ofwaal ’t Nederlands ofwaal in ’t Ingelsj en wurt ’t Limburgs woord automatisch ‘verbaeterd’ door de sjpellingschecker. Dit geuf dèks rare zinne of tekse waer.

    ... dan sjrief mer plat!
    Laes hiej ’t artikel in de Hulsberger

    Ein anekdote in dat sjtök vilt extra op: “Esse Limburgers neet de meugelikheid beejs um ouch digitaal mèt de taal bezig te zin, hilt ’t op ’n gegaeve mement op”. Noe haet de Limburgse Academie zich samegepak mèt Microsoft um ’n Limburgs ‘diakritisch’ aangepas toetsebord te introduceren mèt ’n Limburgse sjpellingschecker. in same wèrking mèt ’t Veldeke. Es alle teste good verloupe, zou ’t dizze maond misjien al besjikbaar zin op alle mobiele Android en iOS (Apple) apparate. Ich wach in eker geval vol sjpanning aaf.

      

    De Hulsberger – jaargang 2 – editie 19 – september 2017

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 02-07-2019

    Toetsenbord

     

     

    Knuupkestejjer.

    [dropcap]I[/dropcap]ch wèrk al jaore mèt de compjoeter en bèn nog ekere daag bliej mèt wat ‘t deit en kènt. En mèt en mèt kènt ’t dink ummer miè en miè. Meh toch nao al die jaore is d’r waal gans get verangerd, want eigelik kalle v’r neet miè euver ‘ne compjoeter, meh euver ’n desktop, laptop, tablet, smartphone.

    ... dan sjrief mer plat!
    Laes hiej ’t artikel in de Hulsberger

    Ein dink wat neet verangerd is, zint al die knuupkes op ’t toetsebord, waovan se van de meiste waal wèts wat d’r gebeurt esse dao op duujs. Dan höb ich ’t veural euver de lètters van ’t alfabèt, de ciefers en de pielkes. Die knuup sjpraeke veur zich. Meh noe bèn ich die angere knuup ins good gaon bekieke en höb die ins umgezat nao ’t Limburgs:

    ‘n DeskTop is e Taofel Hummeke; ‘n LapTop e Sjtoef Hummeke; ’n Tablet e Pilke; ’n Smartphone e Pienapparaat en ’n Toetsenbord is e Knuupkes Tejjer. Ctrl is ‘n Ketrol; Shift is Sjieg; Alt is Oud en Alt Gr is Versjrikkelik um Oud te zin. ’n Caps Lock is e Patsj Sjlaot; ’n Tab is de Teek en Esc is ‘n Eskadron. PrtSc SysRq is Koeterwaals; Pause Break is e Rös Mement; Ins is Eine Kièr en Del is ’n Sjlet. Pg Up is ’t geluid van e sjeetgewaer dat umhoag sjuut en Pg Dn es ‘t umlièg sjuut. Backspace is Mónd Ruumte; Enter is ’n Sjeep Kape; Return is Bambi Gym; ‘n Windows is e Gewónne Doas; Num Lock is e Ciefer Sjlaot of ‘n Pak Gekruld Haor; Home is Heim en es lètse kump End wat Sjloes beteikent en waomèt  ich dizze ónzin ouch aafsjleet.

      

    De Hulsberger – jaargang 2 – editie 29 – oktober 2017

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

  • 01-07-2019

    Het Weer

     

     

    ’t Waer.

    [dropcap]“W[/dropcap]at ‘n waer vandaag, hè?” Dit is zoa’n tiepise vraog um mèt emes ’n gesjprek te wille veure en äöveriges ’t meist gekalde óngerwerp in ós dageliks laeve is.

    Neet gek eigelik, umtot ’t waer groate impek haet op ós fungsjenere. Pak dich mer ins ’t verkièr, ós vakansies of esse ’n leuk oetsjtepke wils make. Um te weite welk waer ’t wurdt, kieke v’r hujerdaags nao bv. “Buienradar” um de waersveursjpellinge tot waal 14 daag veuroet te weite. Meh vreuger waore d’r gein sateliete die dit noe veur ós reigele. Toen keek me nao de wolke, de wind en neet ónbelangriek wie de dere zich gedroge. Hiejdoor zint toen waersjpreuke óntsjtange, wat veur toen geliek waor es ózze Buienradar en die noe nog dèks langskómme.

    ... dan sjrief mer plat!
    Laes hiej ’t artikel in de Hulsberger

    ‘n Waersjpreuk van bv. d’n 11e van d’n 11e  (St. Maarten, St. Martin(us), St. Martijn) haet betrèkking op ’t waer van kómmende winter: “Is ‘t duuster op St. Martin, dan zal de winter zach zin, mer is St. Martin helder, kump de voosj in de kelder”.

    Op 22 november (St. Caecilia) is de patroansdaag veur ’t Gemengd Koar en de fanfaar van Hulsberg: “De daag aan St. Cecilia gewied, is de maotsjtaaf veur de wintertied”.

    En op 23 november (St. Clemens) is ‘t de patroansdaag van de fanfaar van Genhout: “Wintert ’t op St. Clemens hel, wurt de lente klaor en fel”.

    Of ’t oetkump? Gein idee, meh dizze lètste waersjpreuk is zoa klaor wie e zunneke:
    “Es ’t raegent dan is ’t naat, en es ’t vruus dan is ’t glaad”.

      

    De Hulsberger – jaargang 2 – editie 21 – november 2017

    Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

    Helga Keulen

    In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

    Väöl plezeer mèt laeze!

     

    Alle artikele op ’n riej
    … dan sjrief mer plat!

     

    Categorieën

     

    • Next